Зайсандағы аудандық аурухананың жұқпалы аурулар бөлімшесіне күрделі жөндеу жүргізіліп жатыр, деп хабарлайды F16.kz.
ШҚО әкімі Нұрымбет Сақтағанов Зайсан ауданы тұрғындарымен кездесіп, көпшілікті толғандырған сұрақтарға жауап берді. Оның ішінде халық газ тарту, жер телімін беру мәселелерімен қатар аудандық аурухана қызметіне шағым айтты.
Аймақ басшысы аталған медицина мекемесіне барып, күрделі жөндеу жүргізіліп жатқан жұқпалы аурулар бөлімшесімен танысты.
Аудандық аурухананың бас дәрігері Жексенбай Тілеуберлиннің айтуынша, жөндеу жұмысы 15 шілдеге дейін аяқталуға тиіс. Күрделі жөндеуге жалпы соммасы 222 млн теңге қаржы бөлінген.
Жұмыс уақтылы аяқталуы керек. Сапасына да мән беріңіздер. Жұмысшылар екі ауысымға көшіп, еңбек қарқынын арттырсын. Себебі бұл бөлімшедегі науқастардың басқа негізгі ғимаратқа көшірілуі қауіпті әрі қолайсыз болады, — деді Нұрымбет Сақтағанов.
Биыл ауруханаға 4.8 миллион теңгеге кардиотокограф сатып алынған. Сондай-ақ екі маман Түркияда білім алып қайтты.
Келер жылы аудандағы жеті мекемеге жөндеу жүргізу үшін жобалық-сметалық құжаттама дайындап жатырмыз. Жалпы кейінгі жылдары 13 медициналық мекеме жөнделді, — дейді Жексенбай Тілеуберлин.
Фото: F16.kz
