Алдағы бір жарым жылда Зайсан ауданының елді мекендері ұялы байланыспен және интернетпен толық қамтылады, деп хабарлайды F16.kz.
![\"\"](\"https://f16.kz/uploads/posts/2025-05/b24f2955-f00e-472e-ab6e-d2bad6d3aa14.jpg\")
Бұл туралы аудан тұрғындарымен болған кездесуде Шығыс Қазақстан облысының әкімі Нұрымбет Сақтағанов мәлім етті. Оның айтуынша, қазір Зайсанның 17 ауылында ұялы байланыс өте нашар, тіпті жоқ деуге болады.
Қазір ауданның 17 елді мекенінде байланыс жоқ немесе сапасы нашар. Алдағы уақытта Жалши, Шілікті және Жаңатұрмыс ауылдарында базалық стансалар облыстық бюджет есебінен салынған антенна—діңгекті құрылыстарға қосылады. Интернеттің болмауы себепті Мұқашы, Сәтпай, Жіңішкесу, Шалқар, Тасбастау, Жамбыл, Үлкен Қаратал, Кәкенталды, Қарасау, Қабырғатал сияқты бірқатар ауылда проблемалар бар. Бұл ауылдарда шамамен 3800 адам тұрады. Осы мәселелерді ұялы байланыс операторларымен бірлесіп алдағы бір жарым жылда шешеміз, – деді облыс әкімі.
Аймақ басшысының айтуынша, жыл басынан бері облыстың 14 елді мекені кең жолақты интернетке қосылған. Републикалық жол картасына сәйкес 2027 жылдың соңына дейін тағы 125 ауылға интернет қосу көзделген.
Былтыр Шілікті, Жалши, Жаңатұрмыс ауылдарында 230 млн теңгеге үш антенна—діңгекті құрылыс салынды, әзірге олар мемлекеттік тізілімге енгізілген жоқ. Сондықтан бұл базалық стансаларды орнату үшін байланыс операторларымен шарт жасауға кедергі келтіріп отыр. Мәселе жуық арада шешіледі, – деп қосты Сақтағанов.
Фото: ШҚО әкімінің баспасөз қызметі
