Шығыс Қазақстан облыстық мәслихатының кезекті ХХІХ сессиясында өңірдегі туризмді дамыту мен шекаралық аумақтардың әлеуметтік-экономикалық әлеуетін арттыру мәселелері талқыланды. Өз кезегінде ШҚО әкімі Нұрымбет Сақтағанов ірі кәсіпорындарға ерекше ұсыныс жасады, деп хабарлайды F16.kz.
Жиын барысында сөз алған аймақ басшысы алдымен «Алтай – түркі әлемінің алтын бесігі» халықаралық фестивалін қорытындылады.
Қазір өңірде Мемлекет басшысының шекаралық аумақтарды дамыту жөніндегі тапсырмалары жүйелі түрде жүзеге асырылып жатыр. «Алтай – түркі әлемінің алтын бесігі» халықаралық фестивалі соның бір дәлелі деп айта аламыз. Асқақ Алтайдың төрінде дәстүрлі түрде ұйымдастырылатын мұндай шаралар шекара маңындағы аудандардың кешенді дамуына серпін береді, — деп атап өтті ол.
50 мыңнан астам туристің басын қосқан ауқымды шара ішкі туризмнің дамуына ғана емес, инфрақұрылымды жаңғыртып, экономикалық тұрғыда да тиімділігін көрсеткен.
Фестиваль қарсаңында елді мекендер абаттандырылып, жолдар жөнделді, туристерге арналған нысандар ретке келтірілді. Бұл қызмет көрсету сапасының жақсаруына және Катонқарағайға келушілер санының артуына ықпал етті, — деді Нұрымбет Сақтағанов мәслихаттың кезекті сессиясында.
Облыс әкімі Мемлекет басшысының шекаралық аумақтарды дамыту жөніндегі тапсырмалары әлі де жүйелі жалғасын табатынын атап өтті.
Біздің өңірде бірнеше ірі кәсіпорындар жұмыс істейді. Мен осы өндіріс орындарын туризм саласын дамытуға белсенді атсалысуға шақырамын. Олар корпоративтік әлеуметтік жауапкершілік аясында Катонқарағай, Марқакөл, Зайсан және Самар аудандарында қызметкерлеріне арналған заманауи демалыс базаларын салуды қолға алса, бұл өңірдің туристік әлеуетін күшейтуге де, халықтың демалыс мәдениетін дамытуға да оң әсерін тигізеді, — деді ол.
Еске сала кетейік, мұндай тәжірибе 70–80 жылдары Шығыс Қазақстанда кеңінен қолданылған. Қазір Сібе көлдеріндегі, Жаңа Бұқтырма маңындағы, Көгілдір бұғаз мен Аюдадағы көптеген демалыс базалары дәл осындай бастаманың нәтижесінде бой көтерген.
