Қазақстан футзалдан 2030 жылғы Еуропа чемпионатының финалдық кезеңін өткізуге үмітті жеті елдің қатарына енді. Бұл туралы УЕФА баспасөз қызметінің ақпаратында айтылған.
УЕФА мәліметінше, Еуро-2030 турнирін өткізуге түскен өтінімдер саны рекорд көрсеткішке жеткен. Турнирді қабылдауға Қазақстаннан бөлек Хорватия, Финляндия, Франция, Грузия, Польша және Испания таласып жатыр.
«Қорытынды өтінім құжаттары 2027 жылғы 8 маусымға дейін ұсынылуы тиіс, ал УЕФА-ның атқарушы комитеті турнирді өткізетін қауымдастықты 2027 жылғы қыркүйекте тағайындауы керек», — делінген ұйымның ресми сайтында.
Айта кетейік, Қазақстан алдағы жылдары УЕФА-ның бірнеше ірі іс-шарасын өткізу құқығына ие болып үлгерді. 2027 жылы Астанада УЕФА-ның 51-ші Конгресі, сондай-ақ 19 жасқа дейінгі жасөспірімдер арасындағы футзалдан 2027 жылғы Еуропа чемпионатының финалдық кезеңі өтеді. Ал 2028 жылы «Астана Арена» стадионында УЕФА Суперкубогінің матчы ұйымдастырылады.
