Бүгін, 27 маусымда Шығыс Қазақстан облысының жетекші тауар өндірушілері қатысқан «Қазақстанның үздік тауары – 2025» дәстүрлі байқауы өтті, деп хабарлайды F16.kz.
Байқау аясында «Бір ауыл – бір өнім» көрмесі және «Ауыл аманаты» жобасына қатысушылардың өнімдерінің таныстырылымы болды. Ондағы негізгі мақсат – жергілікті өндірушілерді қолдау, олардың өнім мен қызмет сапасын арттыруға ынталандыру, отандық брендтерді ілгерілету және өңірдегі өндірісті дамыту.
Шығыс Қазақстан облысы әкімінің баспасөз қызметі хабарлағандай, көрме жәрмеңке форматында өтіп, келушілер ұсынылған тауарлармен танысып, оларды сатып алу мүмкіндігіне ие болды. Сонымен қатар кәсіпкерлер өздерінің әлеуетті серіктестерімен және жеткізушілерімен жаңа іскерлік байланыстар орнатты.
Біздің облыс өндірістік кәсіпорындарымен, ауыл шаруашылығы өнімдерімен, табиғатының көркемдігімен және қолөнершілерімен танымал. Жыл сайын көрмеде өңірде өндірілетін өнім түрлері артып келеді. Өнімдеріміздің сапасы жоғары, біз өндірісті меңгеріп, шетелдік тауарлармен бәсекеге түсе алатын дәрежеге жеттік. Бұдан бөлек, бүгінгі байқау-көрмеге «Бір ауыл – бір өнім» жобасы мен «Ауыл Аманаты» бағдарламасы аясында жұмыс істейтін кәсіпкерлер де қатысып жатыр. Шығысқазақстандық кәсіпорындар республикалық деңгейде үнемі жүлделі орындарға ие болып келеді. Бұған дейін «Силумин-Восток» ЖШС, «Эмиль» ЖШС, «Восток-Молоко» ЖШС, «Бриссоль» ЖШС, «Пасека» шаруа қожалығы сынды танымал кәсіпорындар жеңімпаз атанды. Биылғы байқаудың тоғыз жүлдегері «Қазақстанда жасалған» брендімен елордамыз – Астана қаласында өтетін республикалық «Қазақстанның үздік тауары» көрмесіне қатысады. Барша қатысушылар мен қонақтарға өз жоспарларын сәтті жүзеге асырып, табысты еңбек тілеймін! – деді ШҚО әкімі Нұрымбет Сақтағанов.
Байқауға қатысушылар өз өнімдерін үш номинация бойынша ұсынды: «Өндірістік мақсаттағы үздік тауарлар», «Халық тұтынатын үздік тауарлар» және «Үздік азық-түлік тауарлары».
Аймақ басшысы байқау комиссиясымен бірге көрмеде ұсынылған барлық тауарлармен танысты.
Іс-шара соңында «Қазақстанның үздік тауары – 2025» байқау-көрмесінің жеңімпаздарын марапаттау рәсімі өтті. Жеңімпаздар республикалық байқауға жолдама алса, «Бір ауыл – бір өнім» жобасының финалистері 5 миллион теңгеге дейінгі гранттық қаржыландыруға қатыса алады.
