Астанада «Назарбаев Университеті» студентінің қазасына байланысты қылмыстық іс қозғалды, деп хабарлайды F16.kz.
РЕСМИ АҚПАРАТ
Ғылым және жоғары білім министрі Саясат Нұрбек Назарбаев университеті студентінің қайтыс болуына байланысты қылмыстық іс қозғалғанын растады.
Астана қаласының полиция департаменті ресми мәлімдеме жасады. Қылмыстық кодекстің 105-бабы бойынша (Өзін-өзі өлтіруге дейін жеткізу) қылмыстық іс қозғалды. Қазір тергеу жүріп жатыр, егжей-тегжейлі ақпарат жария етілмейді. Біз полициямен бірлесіп жұмыс істеп жатқанымызды ғана растаймын, – деді министр журналистерге берген жауабында.
Министр студенттің өлімі қандай да бір тұлғалардың арасындағы дау-жанжалмен байланысты ма деген нақтылау сұрағына жауап беруден бас тартты.
Қазір ондай пікір айтуға болмайды. Тергеу аясында қосымша ақпаратты Полиция департаменті береді. Біз солай келістік, – деп түсіндірді Саясат Нұрбек.
АНЫҚТАЙ КЕТСЕК
2025 жылғы 18 маусымда Астанадағы «Назарбаев Университетінің» жатақханасынан студент қыздың денесі табылғаны хабарланған. Ертеңінде, 19 маусымда министр Саясат Нұрбек жұртшылықты студенттің өліміне қатысты алыпқашпа әңгіме таратпауға шақырды. Министр қайтыс болған студенттің Қазақстан азаматы болғанын растады.
