Шығыс Қазақстанда суармалы жерлерді ұлғайту жоспары орындалмай жатыр, деп хабарлайды F16.kz тілшісі.
2024 жылы Шығыс Қазақстанда 13 мың гектар жерді суармалы ету жоспарланған болатын. Алайда іс жүзіндегі көрсеткіш 7,1 мың гектарға ғана жетті. Биыл шамамен 8 мың гектарға су үнемдеу технологияларын енгізу жоспарланып отыр, бұл 2025 жылғы меженің үштен бір бөлігі ғана.
Облыс әкімдігінің мәжілісінде баяндама жасаған ауыл шаруашылығы басқармасы басшысының орынбасары Дамир Мәмиев ағымдағы жылы жоспар тағы да орындалмай қалуы мүмкін екенін ескертті. Оның сөзінше, бүгінде мемлекет тарапынан шығынның 80%-ына дейін субсидия қарастырылғанымен, аудандарда жұмыс әлі де баяу жүргізілуде.
Белгілі болғандай, қазір Шемонаиха ауданында 679 гектарға жаңбырлатып суару жүйесін орнату жобасы қарастырылып жатыр екен. Облыс әкімі Нұрымбет Сақтағанов мұндай жобалардың санын арттыруды тапсырып, бұл бағыттағы жұмыстарға Серебрянкіде шығарылатын суару қондырғыларын тартуға болатынын айтты.
