Шығыс Қазақстан облысында заңсыз құрылысқа қарсы бақылау күшейтіліп, қаланың құрылыс нарығында тәртіп орнату жұмыстары жүргізіліп жатыр. Бұл туралы Өңірлік коммуникациялар қызметі алаңында өткен брифингте ШҚО мемлекеттік сәулет-құрылыс бақылау басқармасы басшысының орынбасары Самат Каирдинов мәлімдеді, деп хабарлайды F16.kz.
Ведомство өкілінің айтуынша, жыл басынан бері жүргізілген жоспардан тыс тексерулердің нәтижесінде құрылыс қызметімен айналысатын 261 субъектіге қатысты әкімшілік іс қозғалды. Оның ішінде 244 іс тапсырыс берушілерге, 7 іс техникалық қадағалау сарапшыларына, 7 іс техникалық зерттеп-қарау жүргізген ұйымға, 3 іс мердігер мекемелерге қатысты.
Тексеріс нәтижесіне сәйкес, 119 мемлекеттік құрылыс лицензиясының қолданысы 6 айға шектеліп, 2 лицензиаттың қызметі тоқтатылды. Бұдан бөлек, 89 лицензиатқа әкімшілік құқық бұзушылық туралы хаттамалар рәсімделді. Анықталған заң бұзушылықтарды жою жөнінде 58 нұсқама берілді, — деді Самат Каирдинов.
Жаңа Құрылыс кодексі саладағы бақылауды күшейтіп, заң талаптарын сақтауды міндеттейді. Бұл ең алдымен құрылыс нысандарының сапасы мен тұрғындардың қауіпсіздігін қамтамасыз етуге бағытталған.
