Зайсан мен Катонқарағай әуежайы мамыр айында пайдалануға беріледі. Бұл жөнінде Премьер-министрдің орынбасары – ұлттық экономика министрі Серік Жұманғарин Үкімет отырысында айтты, деп хабарлайды F16.kz.
Үкіметтегі жиында Президенттің «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауын жүзеге асыру жөніндегі Жалпыұлттық іс-шаралар жоспарының жобасы ұсынылды. Құжат 12 бағыт бойынша 96 іс-шараны қамтиды.
Соның ішінде көлік инфрақұрылымын кеңейту жоспары жөнінде айтылды. 2027 жылдың мамыр айында Зайсан, Қатонқарағай және Кендірліде жаңа әуежайларды пайдалануға беру жоспарланған. Тағы бір жоба – Астанада жаңа әуежай салу. Жұмысты келесі жылдың маусым айында бастау жоспарлануда.
Бұған дейін де хабарлағанымыздай, Зайсан және Катонқарағай әуежайларында ұшақ билетінің нақты бағасы жаңа рейстер ашылған соң белгілі болады. Дегенмен, жолаушы көлігі және автомобиль жолдары басқармасының мәлімдеуінше, Өскемен-Катонқарағай, Өскемен-Зайсан бағыттарындағы ұшақ билетінің құны шамамен 15-20 мың теңгеден аспайды.
Көлік министрлігі Азаматтық авиация комитетінің «Қазаэронавигация» РМК хабарлауынша, жаңа әуежайлардың негізгі техникалық және пайдалану параметрлері мынандай:
Ұшу-қону жолағы: 2200×35 метр, болашақта ұзындығын 3000 метрге дейін жеткізуге болады.
Әуе кемелері: Bombardier Q400, ATR 42/72, CRJ200 үлгідегі ұшақтарды қабылдай алады.
Жолаушылар терминалы:
Терминал сағатына 150 жолаушыға дейін өткізе алады. Терминал қазіргі заманғы халықаралық стандарттарға толық сәйкес келеді. Жолаушыларға арналған барлық қажетті инфрақұрылым қарастырылған: жайлы күту залдары, ана мен балаға арналған бөлме, қоғамдық тамақтану орны, бөлшек сауда нүктелері, ғибадат жасауға арналған бөлме болады.
Сондай-ақ әуежайлардың құрылысы аяқталған соң Астана, Алматы, Өскемен, Семей қалаларына тікелей әуе рейстері ашылады. Ауданішілік және халықаралық әуе қатынасын дамыту да жоспарда бар. Рейстердің жиілігі әуежайлар пайдалануға берілгеннен кейін нақтыланады.
