Шығыс Қазақстан облысының Жаңаталап ауылында автокөлік дөңгелегін жөндейтін заманауи станция қызметі іске қосылды. Оны «Ауыл аманаты» бағдарламасы аясында жергілікті кәсіпкер Ербол Битибаев ашты, деп хабарлайды F16.kz.
Барлығы 9,8 миллион теңге көлемінде жеңілдетілген несиеге қол жеткізген кәсіпкер көлік дөңгелектерін жөндеуге және ауыстыруға арналған арнайы жабдықтар сатып алған. Қазір ғимарат толық жабдықталып, тұтынушыларға қызмет көрсетіп жатыр.
Жаңа қызметтің іске қосылуы ауылдағы жұрттың жұмысын едәуір жеңілдетті. Бұрын жүргізушілер дөңгелекті ауыстыру немесе жөндеу үшін аудан орталығына сабылса, енді ол қызметтің бәрі ауылда бар. Соның арқасында адамдар уақытты үнемдеп, қосымша шығындарын азайтты.
Жобаны қолға алудағы негізгі мақсат – ауылдағы көліктерге сапалы қызмет көрсету. Қазір ауыл шаруашылығында, құрылыс пен тасымалдау саласында ауыр техника көп қолданылады. Ал дөңгелек жөндеу қызметі – олардың үздіксіз жұмыс істеуі үшін өте маңызды. «Ауыл аманаты» бағдарламасының қолдауы арқылы заманауи жабдықтар алып, осы істі жолға қойдық. Бұл тек маған емес, бүкіл ауылға пайдалы жоба деп ойлаймын, – деді кәсіпкер Ербол Битибаев
Тарбағатай ауданы Жаңаталап ауылындағы бұл станция жергілікті тұрғындар жұмыс істеп, тұрақты еңбекақы алып отыр. Осындай жобалар арқылы «Ауыл аманаты» бағдарламасының ауылдық жерде бизнесті дамытып, халықтың табысын арттыруға және инфрақұрылымды жақсартуға бағытталған тиімді тетік екеніне тағы бір мәрте көз жеткізуге болады.
