Өскеменде жергілікті атқарушы органдардың бюджет қаражатын тиімді пайдалануы және жұмыстың сапалы атқарылуы жіті бақылауға алынған. Бүгінде облыстық Ревизиялық комиссияның кемшіліктерді жою жөнінде берген тапсырмалары орындалып жатыр, деп хабарлайды F16.kz.
Атқарылған жұмыстың жарқын мысалының бірі ретінде мердігер ұйымның кепілдік міндеттемелері аясында Есенберлин даңғылында жүргізілген жөндеу жұмыстарын атауға болады. Нәтижесінде жолдың асфальті қалпына келтіріліп, анықталған ақаулар жойылды. Соның ішінде «AB-Residence» тұрғын үй кешені маңындағы жолдың ойылған тұсы да жөнделді.
Тағы бір мердігер ұйым облыстық драма театрының артындағы Сол жағалау кешені аумағында өткелдер салу кезінде бүлінген асфальтті қалпына келтірді.
Сонымен қатар Қазақстан көшесі бойындағы абаттандыру кезінде жіберілген кемшіліктер жойылды. Бұл қала тұрғындарының сүйікті демалыс орнының жайлылығы мен эстетикалық тартымдылығын арттыруға мүмкіндік берді, әсіресе көпір астындағы аумақтың абаттандырылуы тұрғындарға ерекше қуаныш сыйлады.
Славский жағалауында орналасқан Ұлы Отан соғысы мемориалдық кешенінің қасбеті қалпына келтірілді.
Ревизиялық комиссияның ұсынысы бойынша Қазақстан көшесінің бойындағы Ертіс өзені арқылы өтетін көпірдің асфальт қабатын қалпына келтіретін кешенді жоспар әзірленді. Бұл жоба қала тұрғындары мен қонақтарының қауіпсіз әрі жайлы қозғалысын қамтамасыз етуге бағытталған. Аталған жұмыс келер жылы аяқталады.
Бұдан өзге тапсырмалар мен ұсыныстардың орындалуы Ревизиялық комиссияның тұрақты бақылауында.
