«Жалпыға бірдей білім беру» қоры аясында ата-аналардың және заңды өкілдердің есепшоттарына мектеп формасын, аяқ киім мен оқу-құралдарын сатып алу үшін шамамен 20 млрд теңге аударылды, деп хабарлайды F16.kz.
Барлығы 430 мыңнан астам балаға қолдау көрсетілді, бұл – жалпы көмек алушылардың 87%-ы.
Биыл көмек 500 мыңнан астам балаға көрсетіледі. Оның ішінде жетімдер, ата-анасының қамқорлығынсыз қалғандар, аз қамтылған және атаулы әлеуметтік көмек алатын отбасылардың балалары, сондай-ақ өмірлік қиын жағдайға тап болған балалар бар.
Бүгінде Астана мен Шымкент қалаларында қаражат толық аударылып, отбасылар 100% көмек алды.
Өңірлерде ата-аналардың есепшоттарына қаражат аударылып жатыр. Көмек алғандар сатып алынған тауарларды растайтын құжаттарды ұсынуға тиіс. Төлемді алу үшін өтініш жазу жеткілікті, — деп атап өтті Оқу-ағарту министрлігі Балалардың құқықтарын қорғау комитетінің төрайымы Насымжан Оспанова.
Биыл «Жалпыға бірдей білім беру» қоры бойынша қаржыландыру көлемі 23,1 млрд теңге шамасында. Төлем мөлшері өңірлік бюджетке сәйкес, мәслихат шешімі негізінде белгіленеді және бір балаға кемінде 46 228 теңгеден төмен болмауға тиіс.
Айта кету керек, 2023 жылдан бері материалдық көмек көлемі 2,5 есеге өсіп, 17 мыңнан 46 мың теңгеге дейін артты.
