Өскемендік «Алтай» футбол клубының жастар командасы Болгарияда өткен халықаралық жарыстың чемпионы атанды, деп хабарлайды F16.kz.
Дәл осындай ауқымды турнирге алғаш рет қатысса да, өскемендік жас футболшылар намысты қолдан бермей, азулы қарсыластарымен терезесі тең ойын өрнегін көрсетіп, доданың бас жүлдесін жеңіп алды.
Жарыс барысында 2015 жылғы ойыншылардан құралған команда бірқатар елдің мықты ұжымдарымен кездесіп, қарсыластарының түгелдей дерлігінен басым түсті.
– Бұл жетістік – біздің клуб үшін үлкен серпіліс. Аталмыш жеңіс – бапкерлердің, ойыншылардың және бүкіл команданың орасан зор еңбегінің нәтижесі. Сонымен қатар, бұл клуб стратегиясының сәтті жүзеге асып жатқанын дәлелдейді. Біздің балалар жарқын ойын өрнегін көрсетіп, Еуропа аренасында өздерін мықты жағынан көрсете білді. Бұл жеңіс – бүкіл өңірдің мақтанышы және Шығыс Қазақстандағы футболды дамыту жолындағы маңызды қадам! – деп хабарлады «Алтай» ФК баспасөз қызметі.
