30 тамыз — Қазақстан Республикасы Конституциясының қабылданғанына 30 жыл толады. Айтулы мереке қарсаңында Өскеменде облыстық прокуратура және соттың ұйымдастыруымен конференция өтті, деп хабарлайды F16.kz.
Мемлекеттік және құқық қорғау органдарының, қоғамдық ұйымдардың өкілдері және ғалымдар бас қосқан жиында қатысушылар өзекті тақырыптарды талқылап, баяндама жасады.
Шығыс Қазақстан облыстық сотының төрағасы Манат Комиршинов өз сөзінде Президент бастамасымен қабылданған Әкімшілік рәсімдік-процестік кодекс еліміздің құқықтық жүйесін сақтауда жасалған елеулі қадам болғанына ерекше тоқталды.
Оның айтуынша, кейінгі 3 жылда еңбек құқығын қорғауға байланысты азаматтық істер бойынша талаптардың 60 пайызы сотта қанағаттандырылған.
Мемлекеттік органдар мен азаматтар арасында Жоғарғы соттың әділ және бейтарап шешімі заң үстімдігінің және әділеттіліктің нағыз үлгісі болып саналады. Әкімшілік рәсімдік-процестік кодекс енгізілген сәттен бастап әкімшілік істердің 65 пайызы азаматтардың пайдасына шешілген. Бұл жай ғана статистика емес, сот билігінің Конституцияда бекітілген құқықтарының нақты әрі тиімді кепілі екенін айқындайды, — деді ол.
Ата заңда адам құқықтары ең басты құндылық ретінде бекітілген. Бұған дейін де ел Президенті «Заң және тәртіп» қағидатын жаппай дәріптеру керектігін атап көрсетті. Яғни әділетті қоғам құрып, құқықтық мәдениетті нығайтуға билік пен қоғам қатар атсалысу керек.
Конституцияның 30 жылдығы — жүріп өткен жолды бағамдап, болашаққа жаңа міндеттер айқындайтын маңызды кезең. Заңға бағыну қай кезде де тұрақтылық пен тыныштықтың негізі болған. XVII ғасырда Тәуке ханның тұсында қабылданған қазақ халқының дәстүрлі әдеп-ғұрып заңдарының жинағы “Жеті жарғы” соның дәлелі, — деді ШҚО әкімінің орынбасары Ербол Нұрғалиев.
Конференция соңында қатысушылар пікір алмасып, толғандырған сұрақтарға жауап алды.
