Қазақстанда онкологиялық қызметті жаңғырту бойынша жүйелі жұмыс жалғасуда. Мақсат – онкологиялық ауруларды диагностикалау мен емдеуді барлық өңірлердің тұрғындары үшін қолжетімді ету және обырмен күрестің тиімділігін арттыру, деп жазады F16.kz тілшісі Денсаулық министрлігіне сілтеме жасап.
Белгілі болғандай, Қарағанды, Солтүстік Қазақстан және Абай облыстарында, Астана мен Алматы қалаларында 6 жаңа заманауи сәулелік терапия орталығы ашылды. Онкология орталықтарын жарақтандыруға 31 миллиард теңге бөлінді.
Бұдан басқа, 39 миллиард теңгеге инвестициялық келісім жасалды. Аталмыш келесім аясында төмендегідей жұмыстар жоспарланған:
- Ақтау, Ақтөбе, Қарағанды, Қызылорда және Өскемен қалаларында ПЭТ/КТ-орталықтарын орнату;
- ядролық физика институтында циклотрон кешенін құру.
Бұл обырды диагностикалауды жаңа деңгейге көтеруге және өңірлерді озық технологиялармен қамтамасыз етуге мүмкіндік береді.
– Өңірлік онкология орталықтарының базасында 17 сараптамалық эндоскопиялық орталық ашылды. Осының арқасында қатерлі ісіктерді ерте анықтау деңгейі 31,4%-ға дейін өсті (2023 жылы-30%), – деп жазады министрліктің баспасөз қызметі.
Кешенді жұмыс ерте диагностиканың үлесін арттыруға, өңірлерде жоғары технологиялық хирургиялық операциялар мен сәулелік терапияның қолжетімділігіне, онкологиялық қызмет кадрларын нығайтуға, халықтың қажеттіліктеріне қарай төсек қорын ұтымды бөлуге бағытталған.
