Ақмола облыстық прокуратурасының мәліметінше, ұйымдасқан қылмыстық топ әлеуметтік жағдайы төмен қазақстандықтарды ұрлап әкетіп, олардың атына ірі көлемде несие рәсімдеумен айналысқан, деп хабарлайды F16.kz.
Қылмыстық топ құрамында еліміздің түрлі өңірінен 25 адам болған.
Олардың арасында еліміздегі бірқатар банктің қызметкерлері де бар. Олардың қатысуымен 5 жылдан астам уақыт бойы алаяқтық әрекеттер жасалған. Қылмыстың құрбандары – 348 Қазақстан азаматы, келтірілген залал көлемі – 3,7 млрд теңге, – делінген хабарламада.
Қылмыстық топтың мүшелері ұсталды. Олардың иелігінен 2,7 млрд теңгеге бағаланатын мүлік тәркіленді, оның ішінде жылжымайтын мүлік, автокөліктер мен қолма-қол ақша бар. Қылмыстық іс сотқа жолданды.
