Шығыс Қазақстан облысында сел жүру қаупі бар 13 учаске тіркелген, деп хабарлайды F16.kz.
Соңғы күндері өңірде қолайсыз ауа райы қалыптасып, толассыз жауын-шашын жауды. Осыған байланысты ҚР ТЖМ «Қазселденқорғау» ММ мамандары Катонқарағай ауданының Төтенше жағдайлар бөлімі қызметкерлерімен бірлесіп, “Сарымсақты” гидробекетіне және Бұқтырма өзені алабында тексеру жұмыстарын жүргізді.
Тексеру нәтижесірде су деңгейі қалыпты шегінде екені анықталып, сел жүру қаупі анықталған жоқ. Жағдай тұрақты деп бағаланды, — дейді ШҚО ТЖД баспасөз қызметі.
Айта кетейік, облыста жалпы саны 13 сел қауіпті ошағы тіркелген. Таулы аймақтардың жоғарғы бөлігінде 144 мореналық көл қалыптасқан.
Сел және сырғыма жағдайына мониторинг жүргізу үшін өңірде 9 маусымдық және жыл бойы жұмыс істейтін 1 гидробекет жұмыс істейді.
Күніне үш рет барлық гидробекеттерден сел қаупі бар учаскелердегі гидрометеорологиялық өзгерістер туралы ақпарат жолданады. Халықтың қауіпсіздігін қамтамасыз ету мақсатында сел жүру қаупі кезіндегі әрекет ету тәртібі туралы түсіндіру және алдын алу жұмыстары жүргізілуде, — деп атап өтті департаменттің баспасөз қызметі.
Облыс аумағында гидрометеорологиялық жағдайға бақылау күшейтілген режимде жалғасуда.
