Шығыс Қазақстан облысында пробациялық есепте тұрған 25 жастағы сотталған азамат жазасын өтеу шарттарын өрескел бұзған. Ол полиция мен пробация қызметкерлерінің үйлесімді жұмысының арқасында ұсталды, деп хабарлайды F16.kz.
ШҚО бойынша ҚАЖД баспасөз қызметінің мәлімдеуінше, аяғына электронды білезік тағылған жігіт бойжеткен қызымен бірге мотоциклге мініп, қыдыру үшін түнде үйінен бірнеше рет шыққан. Бұл жағдай пробация қызметкерлерінің назарынан тыс қалмады. Электронды білезіктен алынған ақпарат мониторинг орталығына лезде түсіп, сотталған азаматтың рұқсат етілген аумақтан әр шыққан сәті тіркеліп отырған.
Бұл аздай ол алкогольді ішімдік ішіп алып ауылда жарыс ұйымдастырған. Учаскелік инспектор мен пробация қызметінің қызметкері оны тоқтату үшін оқиға орнына жедел жетті. Сотталған азамат қатты жылдамдықпен жүремін деп мотоциклін басқара алмай аударылып қалған. Құлаған кезде электронды білезікті зақымдаған.
Жүргізушіде құжаты болмағандықтан мотоцикл тәркіленді. Пробация шарттарын бұзғаны және білезікті зақымдағаны үшін ер адамға ескерту жасалып, барлық материал сотқа жіберілді.
Енді оған нақты бас бостандығынан айыру жазасы қолданылуы мүмкін. Сотталған азаматтың жазасын өтеуге 4 ай ғана қалған, оны ол бұл мерзімді темір тордың ар жағында өткізуі мүмкін.
Бұл оқиға заманауи технологиялар мен қызметкерлердің кәсібилігі құқық бұзушылықтаың алдын алуға және қоғамдық қауіпсіздікті қамтамасыз етуге қалай көмектесетінін көрсетеді.
Естеріңізге сала кетейік, Шығыс Қазақстан облысында екі айға созылатын «Учаске» жедел-профилактикалық іс-шарасы өтіп жатыр. Ондағы мақсат — қоғамдық қауіпсіздікті арттыру және полицияның халықпен өзара іс-қимылын нығайту.
