ШҚО-да қымбат металдарды заңсыз өндірді деген күдікпен 19 шетелдік азамат ұсталды, деп хабарлайды F16.kz тілшісі Polisia.kz сайтына сілтеме жасап.
Шығысқазақстандық полицейлер заң тәртібіне ғана емес, аймақ экологиясына да қатер төндірген қылмыстық әрекеттің жолын кесті. «Құқықтық тәртіп» жедел-профилактикалық іс-шарасы барысында тәртіп сақшылары пайдалы қазбаларды заңсыз өндіру фактісін анықтады.
Белгілі болғандай, облыстың бір ауданында 19 шетелдік азамат пен Өскемен қаласының 2 тұрғыны ұсталған. Олардан қымбат металдарды өндіруге арналған экскаваторлар, бульдозер, ұсатқыш қондырғылар және басқа да жабдықтар, сондай-ақ құрамында алтын мен басқа да бағалы компоненттердің белгілері бар металл бұйымдары тәркіленді.
– Аталған факті бойынша сотқа дейінгі тергеу басталды. Тергеу барысында құқыққа қарсы әрекетке қатысы бар болуы мүмкін 20-дан астам адам тексерілуде. Дәлелдер жиналып, қажетті сараптамалар тағайындалды, істің барлық мән-жайын анықтау шаралары қабылдануда, – деп жазады дерек көзі.
