Өскемен қаласының прокуратурасы «Шнайдер көпіріне» байланысты тексеруді бастады. Бұл туралы ведомстваның баспасөз қызметі мәлімдеді, деп хабарлайды F16.kz.
Тексеру аясында жөндеу жұмыстары мен көпірді пайдалануға беруге қатысты барлық құжаттардың заңнамаға сәйкестігі қаралып, мұқият зерттеледі.
Бірқатар техникалық және қаржылық-экономикалық сараптама тағайындалды, лауазымды тұлғалардан жауап алынып жатыр, сондай-ақ оқиғаға дейінгі өзге де мән-жайлар анықталуда. Оқиғаның нақты себептерін айқындау үшін қалалық прокуратура мемлекеттік ғылыми-зерттеу институтының мамандарын тарта отырып, көпір өткеліне зерттеу жүргізіп жатыр, – делінген хабарламада.
Облыстың ішкі істер органдары көпірдің құлау фактісі бойынша Қылмыстық кодекстің 278-бабы 2-бөлігі (сапасыз салынған құрылыс) бойынша қылмыстық іс қозғады.
Сараптамалардың нәтижелері мен жиналған материалдарды талдау қорытындысы бойынша жауапты лауазымды тұлғалардың іс-әрекеттеріне және әрекетсіздігіне қалалық прокуратура тарапынан құқықтық баға береді.
