Қыркүйек айының соңында облыс аумағында «Бекет-2025» кешенді оқу-жаттығулары басталады. Бұл туралы ШҚО әкімі Нұрымбет Сақтағанов жедел-қызметтік кеңес барысында айтты, деп хабарлайды F16.kz.
Бүгін облыс әкімдігінде облыстық әскери-экономикалық жаттығуларды және әскери міндеттілерді шақырумен өтетін тактикалық-арнайы жаттығуларды ұйымдастыру мәселелері бойынша кеңес өтті.
Оқу-жаттығулар 29 қыркүйек пен 4 қазан аралығында өтсе, міндеттілерді шақыру 1–10 қазан аралығына жоспарланған.
«Бекет-2025» кешенді оқу-жаттығуларының мақсаты – дағдарыстық жағдайларда, сондай-ақ әскери қатерлер кезінде жергілікті атқарушы органдардың, күштік құрылымдардың және әскери бөлімдердің өзара іс-қимылын жетілдіру, өңірдің қауіпсіздігі мен қорғаныс қабілетін арттыру.
Шараға 1230 әскери қызметші, 73 бірлік әскери және арнайы техника және облыстағы барлық жергілікті атқарушы органдар қатысады.
