Бүгінде өңірде 10 мыңнан астам ақ халатты абзал жан тұрғындардың денсаулығы үшін аянбай еңбек етіп жатыр. Оның ішінде 2906 білікті дәрігер болса, 7 мыңнан астам орта медицина қызметкері бар. Десе де, облыстағы кадр тапшылығы мәселесі әлі де шешімін таппай тұр, деп хабарлайды F16.kz.
Облыстық денсаулық сақтау басқармасының ақпаратына сүйенсек, қазір 153 маманның штаты бос тұр. Әсіресе, ауылдық жерлерге білікті мамандар ауадай қажет.
Былтыр қатарымыз 36 жас дәрігермен толықты. Мамандар әлі де қажет. Биыл облыстық бюджет есебінен резидентураға 55 маман жіберілді, келесі оқу жылында тағы 20 маманды оқуға жіберу жоспарланып отыр. Сондай-ақ жас дәрігерлерге көтерме жәрдемақы түрінде қолдау көрсетіліп, 15 маман аталған төлемді алды, — дейді облыстық денсаулық сақтау басқармасы басшысының орынбасары Мадина Мырзабекова.
Одан бөлек, мамандардың біліктілігін және медициналық көмектің сапасын арттыру мақсатында дәрігерлерді Германия, Ресей және Түркияның жетекші клиникаларына оқуға жіберу жалғасып жатыр. Мәселен, былтыр 44 дәрігер оқудан өтсе, биыл 72 маман біліктілігін арттыру үшін шетел асқан.
