Өскемен қаласындағы №10 мектеп-гимназиясының алты жасар оқушысы Мансұр Сабитов ағылшын тілі бойынша StemCo English халықаралық олимпиадасында екінші орын иеленді. Енді жас қатысушы қараша айында Сингапурде өтетін халықаралық финалға қатысады, деп хабарлайды F16.kz.
Мансұрдың шет тілді меңгергеніне жүргеніне үш жыл болған. Ағылшын тілін қосымша Анна Калкаева есімді ұстаздан үйренген.
Анасы Алуа Тайтикованың айтуынша, ұлының білімге деген қызығушылығы ерте жастан байқалған. Мансұр екі жасынан бастап оқуды үйреніп, кітап оқуға әуестенген.
Баланың бойындағы осы ерекшелікті ескеріп, қолдауға тырыстық. Ағылшын тілін де біртіндеп үйрете бастадық. Оған жаңа сөздерді меңгеру, өзге тілдің ерекшеліктерімен танысу және бұрын білмеген дүниелерді білу ұнайды. Біз үшін баланың тек білім алып қана қоймай, оқуға деген ынтасын сақтау да маңызды, — дейді анасы.
StemCo English олимпиадасына қатысу Мансұр үшін ағылшын тілінен алған білімін көрсетіп, халықаралық деңгейде өзін сынауға мүмкіндік берді.
