«Бұқтырма ГЭС» АҚ биылғы алғашқы жартыжылдықтағы 56,36 миллиард теңге мөлшеріндегі таза табысын толықтай «Самұрық-Энергоға» дивиденд ретінде аударады, деп хабарлайды F16.kz тілшісі Kursiv.media сайтына сілтеме жасап.
Компанияның хабарлауынша, 2025 жылғы қаңтар-маусым аралығында 56,36 миллиард теңге таза табыс түскен. Бұл табыс 100% дивиденд ретінде аударылады. Дәлірек айтсақ, 54,28 миллиард теңге – қарапайым акцияларға, ал 2,07 миллиард теңге – артықшылықты акцияларға бағытталады.
Белгілі болғандай, дивиденд төлеу 2025 жылғы 16 қыркүйекте басталмақ, ал акционерлер тізімі 2 қыркүйекте жасақталып қойған.
– Жартыжылдық қаржылық есеп ашық жарияланбаған. Компания табыстың күрт өсу себебін де түсіндірмеді. 2024 жылы «Бұқтырма ГЭС» 16,52 миллиард теңге мөлшерінде табыс тапқан (2023 ж. – 21,84 миллиард), таза пайдасы – 13,19 миллиард теңге (2023 ж. – 17,7 миллиард), – деп жазады дерек көзі.
Осы ретте компанияның жалғыз акционері «Самұрық-Энерго» («Самұрық-Қазына» қорының еншілесі) екенін айта кету керек.
2024 жылы сәуірде «Бұқтырма ГЭС» «Самұрық-Энергоға» 0,01% мөлшерлемемен 5 миллиард теңгенің қаржылай көмегін берген. Бұл қаржы 2025 жылғы 22 сәуірге дейін қайтарылуы керек болған, алайда қазір келісімді 2025 жылғы 31 желтоқсанға дейін ұзарту мәселесі қарастырылып жатыр.
Сондай-ақ, компания Ертіс өзеніне қуаты 300 МВт-тан асатын ГЭС салу жөніндегі техникалық-экономикалық негіздемені әзірлеуге 408,2 млн теңге жұмсаған.
2024 жылғы мамырда компания 15,8 миллиард теңге дивиденд төледі. Бұл – сол уақыттағы бөлінбеген пайда мөлшерімен сәйкес келген сома.
