Қазақстанда ауыл шаруашылығы санағының екінші кезеңі өтіп жатыр. Еліміз бойынша Ұлттық статистика бюросының 2,5 мыңнан астам интервьюері елді мекендерді аралап, аграрлық салаға қатысты деректерді жинауға кірісті, деп хабарлайды F16.kz.
Интервьюерлерді арнайы көгілдір түсті формасынан және бейджі бар қызметтік куәлігінен оңай тануға болады. Бейдждегі QR код арқылы қызметкердің жеке басын бірден тексеруге мүмкіндік бар.
Сонымен қатар интервьюердің куәлік нөмірін sanaq.gov.kz сайтындағы «Интервьюерді іздеу» бөлімінде енгізу арқылы немесе 1446 бірыңғай байланыс орталығына қоңырау шалып, ақпаратты нақтылауға болады.
Біз халықты ақпараттандыру бойынша ауқымды жұмыс жүргізіп жатырмыз, оның ішінде ауыл чаттары арқылы да хабарлап отырмыз. Біздің интервьюерлер жеке адамның банк деректерін сұрамайды, барлық сауалдар тек санақ пен ауыл шаруашылығына қатысты. Біз тұрғындарды ашық әрі шынайы жауап беруге шақырамыз. Бұл деректер ауыл шаруашылығының жағдайын объективті бағалауға және қолдау шараларын айқындауға негіз болады, – деді Ұлттық статистика бюросы басшысының орынбасары Әсел Шауенова.
Егер интервьюер келген кезде үйде ешкім болмаса, ол байланыс деректері көрсетілген хабарлама қалдырады. Мамандардың белгіленген мекенжайға бару фактісі GPS жүйесі арқылы тіркеледі. Жалпы, интервьюерлердің жұмысы тұрақты бақылауда. Әрқайсына сауалнаманы дұрыс жүргізуді қадағалайтын нұсқаушылар бекітілген. Сондай-ақ өңірлерге Ұлттық статистика бюросының жұмыс тобы мүшелері шығып, санақтың жүргізілу тәртібі мен жиналған деректердің объективтілігін тексереді. Күн сайын деректердің сапасы бақылаудан өтеді, мұнда қателіктер анықталса, мысалы, респонденттің мекенжайы дұрыс енгізілмесе немесе көрсеткіштер күмәнді болса, түзетулер жасалады.
Ұлттық статистика бюросы барлық жауаптардың құпия сақталатынын және тек ресми статистиканы қалыптастыру үшін ғана пайдаланылатынын еске салады.
Ауыл шаруашылығы санағының офлайн кезеңі 20 қазанға дейін жалғасады.
