Бүгін Шығыстың бас шаһарында «ALTAY INVEST — 2025» халықаралық инвестициялық форумы өтті. Шара аясында жалпы құны 740 млрд теңге болатын 41 меморандумға қол қойылса, оның ішінде 11 жоба туризм саласына бағытталып отыр, деп хабарлайды F16.kz.
Алдағы жылдар Сібенің бірінші көлінде құны 11,5 млрд теңгеге туристік база салу жоспарланған. Ірі жобаға «Виста Лаго» ЖШС инвестор болмақ. Сондай-ақ «ТРЭВЭЛ» ЖШС 56,0 млн теңгеге бақылау алаңын салмақ.
Ал, қытайлық Синьцзян Синьши Хуншунь компаниясы Күршім ауданында 7 млрд теңгеге демалыс базасын салуға келісті.
Катонқарағай ауданының әкімдігі 6 млрд теңгеге туризм саласында бірнеше жоба іске асыру және 8 млрд теңгеге қонақ үй кешенін салу үшін меморандумға қол қойды.
Риддер қаласында 2,1 млрд теңгеге премиум класты нысандар мен мотокросс, эндуро, багги, квадроцикл, маунтинбайк және таулы сноубордқа арналған трасса салынады.
Сонымен қатар туризм саласы бойынша Алтай ауданында 400 млн теңгенің, Үлкен Нарын ауданында 1 млрд теңгенің (бақылау алаңы мен туристік үйлер), Зайсан ауданында 1,5 млрд теңгенің ынтымақтастық жобалары жүзеге асырылмақ.
