Шығыс Қазақстан облысының әкімі Нұрымбет Сақтағанов «Altay Invest-2025» халықаралық инвестициялық форумы аясында Өзбекстанның Қазақстандағы Төтенше және өкілетті елшісі Бахтиёр Ибрагимовпен кездесті, деп хабарлайды F16.kz.
Кездесу барысында өңір мен Өзбекстан арасындағы ынтымақтастықты одан әрі нығайту жайы талқыланды.
Бүгінде екі ел арасындағы байланыс қарқынды дамып келе жатыр. Өзбекстан Республикасы – Шығыс Қазақстан облысы үшін Орталық Азиядағы стратегиялық маңызы бар серіктестердің бірі. Бізді тарихи, мәдени және экономикалық байланыстар біріктіреді. Алдағы уақытта бұл қарым-қатынасты өнеркәсіп, агроөнеркәсіптік кешен, туризм, қайта өңдеу және жеңіл өнеркәсіп салаларында нығайта түскіміз келеді, — деді Нұрымбет Сақтағанов.
Шығыс Қазақстан шетелдік инвесторларға түрлі мүмкіндіктер ұсынып отыр. Аймақта ірі өндірістік кәсіпорындар, табиғи ресурстар, дамыған инфрақұрылым және бизнесті қолдаудың мемлекеттік тетіктері бар.
Бахтиёр Ибрагимов өз сөзінде бүгінгі кездесу екі ел арасындағы тиімді серіктестікті жаңа деңгейге көтеруге бағытталған маңызды қадам екендігін атап өтті. Кездесу соңында тараптар «Altay Invest-2025» форумы табысты жобаларға бастау болатынына сенім білдірді.
