Шығыс Қазақстан облысының Полянское ауылында «Мойылды-Байқоңыр» ЖШС тауарлы-сүт фермасын салу кезінде экологиялық талаптарды бұзған. Бұл заңсыздық облыстық экология департаменті жүргізген жоспардан тыс тексеру барысында анықталды. Тексеруге ҰҚК облыстық департаментінің өтініші негіз болған, деп хабарлайды F16.kz.
Экология департаментінің мәлімдеуінше, Алтай ауданының Полянское ауылында тауарлы-сүт фермасын салғанда қоршаған ортаға антропогендік әсері болған. Яғни, ауаға ластаушы заттар шығарылған, құрылыс жұмысы кезінде қалдықтар жиналып қалған. «Мойылды-Байқоңыр» ЖШС негізінен жер қазу, құрылыс қоспаларын төгу, дәнекерлеу және газбен кесу, гидрооқшаулау, автокөлік құралдарын пайдалану және сырлау-бояу сынды жұмыстар атқарған. Осы жұмыстарды жүргізгенде Экологиялық кодекстің 106, 201, 202, 318 және 319-баптарының талаптары бұзылған.
Тексеру қорытындысы бойынша кәсіпорын әкімшілік жауапкершілікке тартылды, ал іс материалдары Алтай қаласының әкімшілік сотына жолданды. Сот экологиялық рұқсат алынғанға дейін кәсіпорын қызметін бір ай мерзімге тоқтату туралы шешім қабылдады.
