Елордада «Қазақстан Республикасындағы медициналық туризмді дамыту: болашағы мен мүмкіндіктері» атты алғашқы халықаралық конференция өтті. Іс-шараға 30 елден 500-ден астам қатысушы, соның ішінде дипломатиялық миссиялардың өкілдері, Денсаулық сақтау министрлігі мен шетелдік клиникалардың мамандары қатысты, деп хабарлайды F16.kz.
Конференция барысында Шығыс Қазақстан облысының өкілі Көпсалалы онкология және хирургия орталығын таныстырды. Облыстағы онкологиялық көмекті дамыту және шетелдік пациенттерді тарту бағытындағы тәжірибе ұсынылды.
Мекеме деректеріне сүйенсек, орталықта жыл сайын 11 мыңнан астам адам ем қабылдап, 3 мыңнан астам операция жасалады.
Медициналық мекеме 3.0 Tesla қуатты МРТ, Revolution EVO компьютерлік томограф, Elekta Versa HD сызықтық үдеткіші және Exablate INSIGHTEC фокусталған ультрадыбыстық жүйесі сияқты заманауи жабдықтармен қамтамасыз етілген.
Мамандарымыз шетелдік клиникаларда тәжірибеден өткен. Біз халықаралық стандарттарды енгізуге тырысып жатырмыз, сонда ғана пациенттер сапалы медициналық көмекті өз елімізде ала алады, — деді орталық директоры Гүлмира Сағидуллина.
Онкоорталықта медициналық туризм бөлімі құрылып, шетел азаматтарына арналған check-up бағдарламалары мен жеке қызмет пакеттері әзірленген. Бүгінде Шығыс Қазақстанға емделу үшін Ресей, Қырғызстан, Өзбекстан, Беларусь және өзге де елден пациенттер келеді.
Қазақстан Республикасы Денсаулық сақтау министрлігінің мәліметінше, медициналық туризмді дамыту — денсаулық сақтау саласындағы мемлекеттік саясаттың басым бағыттарының бірі болып табылады.
