Бүгін еріктілер, қала әкімдігінің және Home Credit Bank өкілдері облыстық драма театрының аумағын абаттандырып, 100 түп көшет екті, деп хабарлайды F16.kz.
Айта кетейік, Home Credit Bank 20 жылдық мерейтойына орай «Жасыл Саяжол» экологиялық акциясын бастаған.
Акция аясында еліміздің 12 қаласында барлығы 1200 ағаш отырғызу жоспарланған.
Бүгін бұл бастама Шығыстың бас шаһарында жалғасын тапты.
Өнеркәсіптік қала үшін мұндай шаралар өте маңызды. Ағаштар ауаны тазартып, шаңды азайтып, тұрғындар үшін жайлы демалыс орнын қалыптастырады. Біз банк ретінде қаламыздың одан әрі жасыл және жайлы болуына үлес қосып жатқанымызға қуаныштымыз, — деді Өскемен қаласындағы Home Credit Bank филиалының директоры Данат Хасенов.
Тазалық шарасына қалалық жастар орталығы да белсене қатысты. Елімізде “Таза Қазақстан” акциясы басталғалы шаһар жастары игі істерге жиі атсалысып тұрады.
— Біздің әдемі, жасыл қаламызды одан әрі көркейте түсуге қол ұшын созып, осындай шаралар ұйымдастырылып жатқаны қуантады. Өскелең ұрпақтың бойында экологиялық мәдениетті қалыптастыру үшін өте маңызды деп ойлаймын. Мұнда бүгін экологиялық жауапкершілікті сезінетін, табиғатқа жанашыр жандар бас қосты, — дейді қалалық жастар орталығының директоры.
Айта кетейік, “Жасыл саяжол” акциясы алдағы күндері басқа да өңірлерде жалғасады.
