Шымкентте визуал медиа — Beine.Pro интернет журналының тұсаукесері өтті, деп хабарлайды F16.kz.
Kiiz space өнер кеңістігінде ұйымдастырылған іс-шараға өңір журналистері, медиа сарапшылар, түрлі саланың кәсіби мамандары, бұған дейін жасаған контенттің кейіпкерлері, баспасөз хатшылары мен бизнес өкілдері қатысты.
Beine.Pro — Шымкент қаласы мен Түркістан облысының тыныс-тіршілігін фото, видео және иллюстрацияға негізделген контент түрінде ұсынатын дербес интернет журнал.
2019 жылдан бері Internews Kazakhstan ұйымының қолдауымен «Түркістан тіршілігі», «Үрейін жеңген», «Түркістан әйелдері», «Сусырау» медиажобаларын жасап, фотокөрмелер өткізіп, тәжірибе жинадық. Бұдан бөлек, ÓzgeEpic креатив хабының бастамасымен «Білім беру саласын тұрақты дамыту» қорының қолдауымен «Ауыл мектебі» фотокөрмесін және А.Ясауи атындағы ХҚТУ-нің қолдауымен «Ясауи университеті — Жаһандық жас ғалымдар» фотокөрмесін өткіздік. Енді осы жобалардың ізімен Шымкент қаласы мен Түркістан облысының тыныс-тіршілігін, аймақтағы проблемаларды, адам тағдыры мен хикаяларды негіз ете отырып, фото және видеомен байытылған сапалы репортаждар жасауды жалғастырамыз, — деді Beine.Pro-ның визуал контент продюсері, фотожурналист Әйгерім Бегімбет.
Beine.Pro командасы әйел мен бала, ауыл өмірі, экология, ғылым-білім, денсаулық, өнер, урбанистика, бизнес, жасанды интеллект тақырыптарына баса назар аударады. Beinepro.kzсайтында фоторепортаж, видеорепортаж, сторителлинг, дата жобалар жарияланады. YouTube-тағы BeinePro арнасында қаралым саны 300 мыңнан, TikTok пен Instagram-дағы видеолардың қаралымы 200 мыңнан асты.
Бұған дейін жасаған барлық медиажобаның контенті түрлі платформада жарияланып келді. Соның барлығын бір ортаға жинап әрі медиажобаларды жалғастыру, жаңа тақырыптар қосып, тұрақты контент өндіретін редакцияға айналуды жоспарлап, Beine.Pro интернет журналын құрып отырмыз. Мәселен, «Ясауи университеті — Жаһандық жас ғалымдар» фотокөрмесінде фотосы қойылған 14 ғалым туралы фоторепортаж, мақала, сұхбат дайындап жатырмыз. Редакциямыз — горизонталь құрылымда жұмыс істейтін шығармашылық бірлестік. Авторлармен жұмыс істеуді нығайтамыз. Монетизацияның түрлі әдіс-тәсілін енгіземіз. Жаңа форматтарда контент жасаймыз. Мақсатымыз — жасанды интеллект пен заманауи digital құралдарды қолдана отырып, бірақ шынайылықтан ауытқымай, өмірдің өзін қаз-қалпында көрсететін сапалы контент өндіріп, жергілікті медианарықты дамытуға үлес қосу, — деді Beine.Pro интернет журналының бас редакторы Жәнібек Нұрыш.
Тұсаукесер «Тіршілік» және «Түркістан әйелдері» медиажобасында қойылған фотокөрмеден басталып, Beine.Pro интернет журналының презентациясына ұласып, Қазақстанның түрлі өңірінен келген медиасарапшылар: Молдияр Ергебеков, Бақыт Аманжолқызы, Думан Смақов, Жұлдыз Әбділда, Асхат Еркімбай, Асқар Ақтілеу қатысқан панельдік дискуссияға жалғасты. Медиасарапшылар пікірталқыда медиа этикасы, интеллектуал медиа, редакция стандарты, медианың стратегиясы, фактчекиң мен дезинформация, өңірлік медианың кіріс көздері және жасанды интеллект дәуіріндегі журналистика туралы айтты.
