Еліміздің түкпір-түкпірінде IQanat олимпиадасының І кезеңі бастау алды. Интеллектуалды сайысқа қатысушылар саны жыл санап артып келеді. Биыл 3300 ауыл және 170-тен астам ауданнан 64 000 бала тіркелген, деп хабарлайды F16.kz.
Аталған жобаның ерекшелігі – жеңімпаз атану үшін мектептегі бағалары мен жетістіктері маңызды саналмайды. Бұл кезең аясында балалар кешенді тестілеуден өтіп, олардың математикалық және оқу сауаттылығы, логикалық ойлау мен қазақ тілі бойынша білімі бағаланады.
Олимпиада жылдан жылға ауыл балаларының үздік білім алуына жол ашып келеді. Өткен жылдан бастап оқ бойы озық шыққан жеңімпаздарға Гарвард, Йель не Барқыт Лигасының басқа да университетіне толық грант беру туралы шешім қабылнады.
Олимпиаданың барлық үш турынан сәтті өткен жеңімпаздарға қамқоршылар IQanat High School of Burabay мектеп-пансионатында немесе олимпиададан кейінгі үш жылдық сүйемелдеу бағдарламасы бойынша оқуға грант береді. Оның аясында балалар ҰБТ және халықаралық емтихандарға дайындалады, ағылшын тілін тереңдетіп, ІТ, кәсіпкерлік және soft skills дағдыларын дамытады.
Балалар үшін бұл расымен де үлкен мүмкіндік. Дайындықтан кейін IQanat түлектерінің 94%-ы ЖОО-ға грантқа түседі. Өткен жылы IQanat Назарбаев Университетіне түскен түлектер саны бойынша үздік 5 мектептің қатарына кірді. Қазір онда біздің 90-ға жуық түлегіміз білім алып жатыр. Одан бөлек, түлектеріміз әлемнің 19 елінде білім алып жатыр. Балалардың ынтасын одан әрі арттыру үшін жоба қамқоршылары америкалық беделді ЖОО-да оқудан бөлек, жатын, жол және өзге де шығындарды өтейтін грант бөлді, — дейді жобаның атқарушы директоры Азамат Ашамаев.
Айта кетейік, IQanat – қазақстандық 240 кәсіпкердің әлеуметтік білім беру жобасы. Әрбір кәсіпкердің жүріп өткен жолы жоба қатысушылар үшін үлгі болмақ.
