Өскеменнің «Аltai» футбол клубы Қазақстан Премьер-лигасына шығуға жақын. Ол үшін келесі ойында жерлестерімізге тең ойнаса да жеткілікті, деп хабарлайды F16.kz порталы.
Бірінші лига аясындағы жарыстың соңғы турында өскемендік команда өз алаңында Шымкенттің «Оңтүстігін» қабылдайды. Дәл қазір қоржынында 52 ұпайы бар «Аltai» командасы турнир кестесінің үшінші орнында орналасуда. Оның қарсыласы – «Оңтүстік» клубы 39 ұпаймен алтыншы орында келе жатыр.
Жоғарыда жазғанымыздай, өскемендік командаға ҚПЛ жолдамасына қол жеткізу үшін соңғы ойында бір ұпай алса, яғни тең ойнаса да жеткілікті. Бүгінде біздің команданың жоғары дивизион жолдамасы үшін басты қарсыласы саналатын Қарағандының «Шахтерінде» 50 ұпай бар. Үшінші орыннан үміт үзбеген қарағандылықтар соңғы турда жеңіске жетіп, «Аltai» командасының сүрінгенін, жеңілгенін күтеді.
Сондықтан соңғы ойында біздің футболшылар ең алдымен жеңілмеу, өз қақпасын голдан аман сақтап қалу жағын ойлауы керек.
Еске салайық, «Аltai» мен «Оңтүстік» арасындағы шешуші матч 24 қазан, жұма күні қаламыздағы «Восток» стадионында өтеді. Сағат 14:00-де басталатын ойынды кез келген адам келіп тамашалай алады, стадионға кіру тегін.
– Бұл ойында барлығы шешіледі – Премьер-лига жолдамасы, намыс және тарих! Кел, өз командаңа қолдау көрсет! Бірге ҚПЛ жолдамасына қол жеткізейік, – деп жазады клубтың баспасөз қызметі.
