Қаржылық мониторинг агенттігінің Батыс Қазақстан облысы бойынша департаменті прокуратураның үйлестіруімен банк шоттарын заңсыз иелену және оларды басқару арқылы рұқсат етілмеген төлемдер мен ақша аударымдарын жүзеге асыру дерегі бойынша сотқа дейінгі тергеу жүргізіп жатыр, деп хабарлайды F16.kz.
Тергеу барысында ұйымдастырушылар жастарға уақытша табыс табу мақсатында өз атына екінші деңгейлі банктерден шот ашуды ұсынғаны анықталды.
Интернет-банкингтің мобильді қосымшалары орнатылған соң бұл шоттарға кіру мүмкіндігі қылмыстық топтың бақылауына өткен. Осы әрекетке қатысқан азаматтар, яғни «дропперлер» 200-350 АҚШ доллары көлемінде сыйақы алып отырған. Олардың атына ашылған шоттар интернет алаяқтық құрбандарынан түскен қаражатты заңсыз аудару үшін пайдаланылған. Заңсыз айналымдағы қаражат көлемі 17 миллион теңгеден асқан, – деп мәлімдеді ҚМА баспасөз қызметі.
Тергеу материалдарында бір дроппердің банктік картасы бұғатталғаннан кейін қылмыстық топтан бас тартқаны, алайда ұйымдастырушылар оны күш қолданып қорқытып, шотқа қайта кіруді талап еткені көрсетілген.
Қазіргі уақытта негізгі ұйымдастырушы күдікті ретінде танылып, соттың санкциясымен қамауға алынған. Тергеу амалдары жалғасып жатыр..
Айта кетейік, биылғы 16 қыркүйектен бастап Қазақстан Республикасының Қылмыстық кодексіне жаңа 232-1-бап енгізілді. Онда банктік шоттарға, төлем құралдарына немесе сәйкестендіру деректерін заңсыз беруге, таратуға не иеленуге жауапкершілік көзделген. Бұл бап бойынша мүлкін тәркілей отырып, 7 жылға дейін бас бостандығынан айыру жазасы қарастырылған.
