Бүгінде Шығыс Қазақстан облысы халқының 97,1%-ы интернетке қол жеткізген. Өңірдегі 357 елді мекеннің 235-і ғаламторға қосылып, цифрлық жүйенің игілігін көріп отыр, деп хабарлайды F16.kz.
Өңірде тұрғындардың өмір сапасын арттыруға, инфрақұрылымды дамытуға және мемлекеттік басқаруды жетілдіруге бағытталған заманауи шешімдерді қолға алынған. Оның ішінде елді мекендерді жаһандық желімен қамтамасыз ету міндеті ерекше назарда.
Облыста халықтың 97,1%-ы, яғни 706 мың адам интернетке қол жеткізген. Барлық 357 елді мекеннің 235-інде ғаламтор бар, жыл соңына дейін тағы 56 ауылды қамту жоспарланған, – деді өңірлік коммуникациялар қызметі алаңында өткен баспасөз мәслихатында облыстың цифрландыру және архивтер басқармасы басшысының орынбасары Арнұр Сапарғалиев.
Оның айтуынша, шалғай елді мекендерді интернетке қосу 2027 жылға дейін кезең-кезеңімен жүзеге асырылады. Бюджет есебінен 14 антенна-мачталық құрылым орнатылған, олар Топқайын (Катонқарағай ауданы), Қыстақ (Глубокое ауданы) және Жоғарғы Тайнты (Ұлан ауданы) ауылдарында байланыс орнатуға мүмкіндік берді.
Өскеменде 5G байланысының 32 базалық станциясы орнатылды, жыл соңына дейін олардың саны 62-ге дейін жеткізіледі.
