Шығыс Қазақстан облысы Үйлестіру кеңесінің алаңында отбасылық-тұрмыстық зорлық-зомбылықтың алдын алу мәселелері талқыланды. Бұл туралы Шығыс Қазақстан облысының прокуратурасы мәлім етті, деп хабарлайды F16.kz.
Биылғы 10 айдағы деректерге сүйенсек, облыста отбасылық-тұрмыстық құқық бұзушылықтардың 27%-ға өскені байқалады. Денсаулыққа қасақана жеңіл зиян келтіру және ұрып-соққаны үшін жауапкершіліктің күшейтілуіне қарамастан, іс жүзінде әлі де бірқатар мәселе бар. Бұл проблемалар қоғамдағы қалыптасқан стереотиптермен, мұндай құқықбұзушылықтардың жасырын сипатымен, сондай-ақ уәкілетті органдардың құқық қолдану тәжірибесі мен профилактикалық жұмысының кейбір кемшіліктерімен байланысты.
Отырысқа қатысушылар есепте тұрған отбасыларда атаулы профилактиканы күшейту, зардап шеккендерді ведомствоаралық сүйемелдеу тетігін енгізу, барлық жұмылдырылған құрылымдар арасында тұрақты ақпарат алмасуды жолға қою қажеттілігі туралы ортақ пікірге келді.
Талқылау нәтижелері бойынша өңірдегі отбасылық-тұрмыстық зорлық-зомбылық деңгейін жүйелі түрде төмендетуге бағытталған Үйлестіру кеңесінің келісілген ұсынымдары әзірленді.
