ШҚО-да көлеңкелі экономикамен күрес бағытында жүйелі әрі ауқымды жұмыстар жүргізіліп жатыр. Бұл туралы ШҚО бойынша Экономикалық тергеп-тексеру департаменті басшысының орынбасары Тимур Мұқанов Өңірлік коммуникациялар қызметінде өткен брифинг барысында мәлімдеді, деп хабарлайды F16.kz.
Көлеңкелі экономикамен күресте басты назар активтерді қайтару, заңсыз жер қойнауын пайдалану, энергетика және кәсіпкерлік саласындағы көлеңкелі схемаларға аударылған.
Жыл басынан бері жалпы залал көлемі 3 млрд теңгеден асатын 17 қылмыстық іс тергелген. Нәтижесінде 1,9 млрд теңге көлеміндегі мүлік мемлекет меншігіне қайтарылды.
Мәселен, «Бипэк-Азия Авто» компаниялар тобына қатысты тергеу нәтижесінде мемлекет кірісіне жалпы құны 11,6 млрд теңгеден асатын мүлік тәркіленді. Оның ішінде автокөліктер, жылжымайтын нысандар, әуе кемелері және демалыс базасы бар, — дейді Тимур Мұқанов.
Сондай-ақ жүргізілген жұмыстар нәтижесінде Д. Серікбаев атындағы ШҚТУ-ға тиесілі, алайда бұрын заңсыз иеліктен шығарылған «Алтай ШҚАТ» ЖШС ғимараты мемлекет меншігіне қайтарылды. Аталған нысанның құны шамамен 1,5 млрд теңгені құрайды.
— Заңсыз жер қойнауын пайдалануға қарсы іс-қимыл күшейтілді. Биыл Ұлан ауданының Шыбынды және Самар ауданының Құлынжон өзендерінің аңғарларында бағалы металдарды заңсыз өндірудің екі фактісі тіркелді. Мемлекетке келтірілген залал 400 млн теңгеден асты. Тергеу барысында 6 келіден астам алтын (380 млн теңге), 56 мың АҚШ доллары және кен өндіруге арналған техника тәркіленді. Заңсыз өндірісті ұйымдастырған тұлғалар қамауға алынып, қылмыстық іс сотқа жолданды, — деп атап өтті департамент өкілі.
