Шығыс Қазақстанда бокстан жасөспірімдер арасындағы ел чемпионаты аяқталды. Тура бір аптаға созылған жарыс қорытындысы бойынша ШҚО құрамасы жүлделі екінші орынға ие болды, деп хабарлайды F16.kz порталы.
17-23 қараша аралығында Өскемен қаласында өткен чемпионатқа еліміздің барлық өңірінен 2008-2009 жылдары туған 400-ге жуық боксшы жиналды.
Тартысты өткен жарыста Шығыс Қазақстан облысының құрамасы жоғары деңгейде өнер көрсетіп, үздіктер қатарынан көрінді. Жалпыкомандалық есепте бірінші орынды Алматы қаласының құрамасы иеленсе, үшінші орынға Алматы облысының боксшылары көтерілді.
Ал біздің боксшылардың еншісінде 7 медаль бар. Олардың екеуі алтын, бірі күміс және төртеуі қола. Атап айтсақ, биылғы жарыста чемпиондық атаққа қол жеткізгендердің арасында жерлестеріміз Темірали Темірбаев (55 келі) пен Алдияр Баяндинов (65 келі) те бар. Сондай-ақ Алтай Абзал (50 келі) күміс жүлдеге қол жеткізсе, Шафих Баянды (55 келі), Нұрасыл Қарымбек (75 келі), Мансұр Жұмажан (80 келі) мен Күмісбек Қажымұқан (85 келі) қоржынға қола медаль салды.
Ұйымдастырушылардың мәліметінше, бұл чемпионат – елдің ең мықты жас боксшыларын анықтайтын маңызды кезең. Дәл осы жарыс қорытындысы бойынша алдағы дүбірлі додаларда ел намысын қорғайтын Қазақстан жасөспірімдер құрамасы жасақталмақ.
