Шығыс Қазақстан облысына жұмыс сапарымен келген экология және табиғи ресурстар вице-министрі Жомарт Әлиев жергілікті кәсіпорындар өкілдерімен, тұрғындармен және БАҚ қызметкерлерімен кездесу өткізді. Кездесуде көптің көкейінде жүрген экология мәселесі қозғалды, деп хабарлайды F16.kz.
Облыста қауіптіліктің бірінші санатындағы 67-ге жуық кәсіпорын жұмыс істейді. Олардың ішіндегі ең ірілері: «Казцинк» ЖШС, «Үлбі металлургия зауыты» АҚ, «Өскемен титан-магний комбинаты» АҚ, «Өскемен ЖЭО» АҚ, «Бұқтырма цемент компаниясы» ЖШС және басқалары. Ірі кәсіпорындардың үлесіне шығарындылардың жалпы көлемінің 62,5%-ы келеді. Бұл ретте 2024 жылдың ұқсас кезеңімен салыстырғанда облыста шығарындылар көлемі 2 мың тоннаға (1,5%) төмендеді.
Қоршаған ортаға теріс әсерді одан әрі азайту үшін 20 кәсіпорында автоматтандырылған мониторинг жүйелерін (АЖМ) орнату көзделген. Бүгінгі таңда сондай 10 жүйе енгізіліп, деректерді нақты уақыт режимінде беріп отыр.
Шығыс Қазақстан облысының 2023-2025 жылдарға арналған экологиялық проблемаларын кешенді шешудің Жол картасын іске асыру жалғасып жатыр. Құжатқа енгізілген 66 іс-шараның 40-ы орындалды.
Кездесу барысында қалдықтарды басқару мәселелеріне ерекше назар аударылды. Барлығы 165 қатты тұрмыстық қалдықтар полигонының тек 21-і экологиялық және санитарлық талаптарға сәйкес келеді. 2025 жылдың тоғыз айында 186 заңсыз полигон анықталды, оның 111-і (59%) жойылды. Экология министрлігі саланы жетілдіру бойынша жүйелі жұмыс жүргізіп келеді: кәдеге жарату алымдары есебінен «Эко-Қолдау» бағдарламасы бойынша төлемдер жаңартылды, өтінімдерді қабылдау жалғасты. Сондай-ақ қалдықтарды басқару саласындағы инвестициялық жобаларды жеңілдікпен қаржыландыру тетігі бекітілді.
Былтыр желтоқсан айында әкімдік 43 іс-шараны қамтитын «Таза Қазақстан» экологиялық мәдениетті дамыту тұжырымдамасын іске асыру жөніндегі өңірлік іс-қимыл жоспарын бекітті. Оның аясында @TazaQazBot телеграм-чат-боты іске қосылды.
Кездесу барысында Жомарт Әлиев өңірді көгалдандыру, ерекше қорғалатын табиғи аумақтарды дамыту және жануарлар дүниесін қорғау мәселелерін де қозғады. Жиыннан кейін вице-министр БАҚ өкілдерінің сұрағына жауап беріп, азаматтарды жеке мәселелері бойынша қабылдады.
