ШҚО полицейлері оқушыларға арнап профилактикалық тренинг ұйымдастырды, деп хабарлайды F16.kz тілшісі Polisia.kz сайтына сілтеме жасап.
«Гендерлік зорлық-зомбылыққа қарсы 16 күн белсенді іс-қимыл» акциясы аясында ШҚО Полиция департаментінің қоғамдық қауіпсіздік басқармасы және отбасы мен тұрмыстық зорлық-зомбылыққа қарсы бөлімінің қызметкерлері облыстық балалар мен жасөспірімдер кітапханасында мектеп оқушыларына профилактикалық тренинг және дөңгелек үстел ұйымдастырды.
Кездесу форматы барынша ашық болды. Лекция, интерактив және «сұрақ-жауап» блоктары өткізілді.
Оқушылар алғашқы минуттан белсенді қатысып, қиын жағдайда қалай әрекет етуге, көмекке қайда жүгінуге және өздерін немесе достарын қалай қорғауға болатынын сұрап білді.
Полицейлер қарапайым әрі түсінікті тілмен тұрмыстық зорлық-зомбылықтың не екенін, қауіпті жағдайды қалай тануға болатынын және мәселені жалғыз шешпеу үшін қандай қадамдар жасау керектігін түсіндірді.
– Кездесудің соңында полицейлер жасөспірімдердің өз құқықтарын білуі, сыйластыққа негізделген қарым-қатынас орнатуды үйренуі және алаңдататын нәрселер туралы айтуға қорықпауы маңызды екенін атап өтті, – деп жазады дерек көзі.
