Жол қозғалысы ережесін бір жылда 32 рет бұзған Шығыс Қазақстан облысының тұрғыны жол апатынан мерт болды. Ол соңғы рет қарсы бағытқа шығып, апатқа ұшыраған. Жүргізушімен бірге екі жолаушы оқиға орнында тіл тартпай кеткен. Бұл туралы Бас прокуратурада өткен жиында айтылды, деп хабарлайды F16.kz.
Қадағалаушы орган өкілдері бас қосқан мәжілісте елдегі жол қозғалысы қауіпсіздігі мәселесіне ерекше назар аударылды. Мамандар жүйелі түрде ереже бұзатын жүргізушілер саны жылдан-жылға өсіп бара жатқанына алаңдаушылық білдірді. Бас прокуратураның мәліметінше, елдегі жол апатының 81 пайызы бұрын бірнеше рет жол ережесін бұзған адамдардың кесірінен болған. Мәселен, ШҚО тұрғыны бір жылда жол қозғалысы ережесін 32 рет бұзған, оның ішінде жылдамдықты шектен тыс арттыру жағдайлары жиі қайталанған. Бір жолы ол қарсы бағытқа шығып кетіп, қасындағы екі жолаушысымен бірге қаза тапты.
Тағы бір жүргізуші екі жылда 72 рет ереже бұзған. Тамыз айында Алматыда жаяу адамды қағып, мерт қылды.
Бас прокурор Берік Асылов жүргізуші куәлігін беру кезінде бақылауды күшейтіп, жемқорлық әрекеттің болуына жол бермеу қажеттігін ескертті.
