Қазақстандық кәсіпқой боксшы Жәнібек Әлімханұлы допинг қолданды деген күдікке ілінді. Астана уақытымен 7 желтоқсан күні таңертең өтеді деп жоспарланған жекпе-жек алдында болған тексеру барысында оның тапсырған допинг сынағы талапқа сай болмай шықты, деп хабарлайды F16.kz.
Бұл ақпаратты Дүниежүзілік бокс ұйымы (WBO) допингке қарсы ерікті қауымдастықтан (VADA) келген мәліметке сүйене отырып жариялады. Ұйымның ресми хабарламасында: «WBO өз ережелері мен қағидаттарына сәйкес, сондай-ақ спорттағы адалдық пен әділдікті қамтамасыз ету мақсатында ішкі тергеу жүргізуді бастайды», – деп көрсетілген.
Алдағы күндері Жәнібек Әлімханұлы Лара Эрисландимен шаршы алаңға шығуға тиіс еді. Бұл жекпе-жек алдындағы тексеріс жоспарлы түрде өткізілген. Алайда туындаған допинг мәселесінен кейін Әлімханұлының аталған қарсыласпен кездесуге шықпайтыны белгілі болды. Ал Лара Эрисланди 34 жастағы колумбиялық боксшы Йохан Гонсалеспен бокстасады.
Қазақстандық боксшының өзі бұл туралы Instagram желісінде былай деп жазды:
Мен әрқашан таза спортты қолдаймын. Мұны жақсы білесіздер. Мен таза спортты насихаттап жүргенімді де білесіздер. Жаңалықты оқып таң қалып отырмын. VADA бірінші рет анализ алып бәрі таза деп еді. Мен витаминдеріме де тамағыма да ешқандай өзгеріс енгізбедім. Екінші рет тестте неге мұндай болғанын түсінбей отырмын, біз қайта анализ тапсыруға өтініш айттық. Жауабын күтіп отырмыз!
