Риддерде бәзбіреулер Даңқ обелискіндегі Мәңгілік алауда кәуап пісірмек болған, деп хабарлайды F16.kz тілшісі.
Бұл жағдайда бүгін таңертең жергілікті тұрғындардың бірі байқап, суретке түсірген. Куәгердің айтуынша, оқиға орнында ешкім болмаған. Ол толық піспей қалған тауық етін жақын маңдағы қоқыс жәшігіне тастап, артынша құқық қорғау органдарына хабарласқан.
– Біздің қалада камералар жұмыс істей ме, жоқ па? Мәңгілік алауда тауық қуыру деген сұмдық қой. Жалпы, бұл ескерткіштің айналасы қоқысқа толы, қары да тазаланбайды. Биліктегілер осыған көңіл бөлсе, – дейді Наталья есімді оқиға куәгері.
Бұл үндеуге билік дереу әрекет етті. «Эталон» фирмасы» ЖШС қызметкерлері обелиск маңындағы қарды тазалап, ескерткіш аумағын ретке келтіргендей болды. Алайда жергілікті тұрғындар алтын жұлдыздың өзі лас күйінде қалып қойғанын, оның үстінде тауық қуырудан қалған күл әлі жатқанын айтып шағымданып отыр.
Риддер қаласының ТҮКШ, жолаушылар көлігі және автомобиль жолдары бөлімінің басшысы Рауан Құрметұлы жұлдыздың да міндетті түрде тазаланатынын айтты.
Ал қалалық полиция бөлімінің өкілдері Мәңгілік алауды қорлағандар міндетті түрде анықталып, жауапкершілікке тартылатынын жеткізді.
