Белгілі ақын, жазушы және қоғам қайраткері Олжас Сүлейменов Нобельдің бейбітшілік сыйлығына ұсынылды. Бұл туралы «Байтақ» жасылдар партиясының баспасөз қызметі мәлім етті, деп хабарлайды F16.kz.
Алматыда өткен партияның V қалалық конференциясында ел тарихы үшін маңызды шешім қабылданған. Партия төрағасы Азаматхан Әміртаев белгілі қаламгер және «Невада–Семей» антиядролық қозғалысының негізін қалаушы Олжас Сүлейменовтің аталған беделді марапатқа ресми түрде ұсынылғанын жариялаған. Партия мүшелері бұл бастама ақынның тек Қазақстанда емес, бүкіл әлемдегі бейбітшілік пен қауіпсіздікке қосқан үлесін мойындау деп атап өтті.
Сонымен қатар ұйым өкілдері Сүлейменовтің атқарған жұмысы Семей ядролық полигонының жабылуына ықпал еткенін айтты.
Айта кетеік, Қазақстанның халықаралық аренадағы белсенді қадамдарының нәтижесінде АҚШ-тың Невада штатындағы және бірнеше мемлекеттегі төрт ірі ядролық сынақ аймағының жұмысы тоқтатылған. Бұл жаһандық ядролық қауіпсіздікке бағытталған аса маңызды жетістік болып саналады.
