2026 жылы денешынықтыру және спорт саласына 17,4 млрд теңге көлемінде қаржы бөлу жоспарланып отыр. Бұл туралы облыстық мәслихаттың 16 сессиясында ШҚО экономика және бюджеттік жоспарлау басқармасының басшысы Нұрсұлтан Маратов айтты, деп хабарлайды F16.kz.
Қаражат саланың инфрақұрылымын жаңғыртуға, кәсіби спортты дамытуға және балалар мен жасөспірімдерді қамтуға бағытталып отыр.
Сала бюджетінің негізгі бөлігі, яғни 12,7 млрд теңге өңірдегі 38 спорт мектебінің жұмысын қамтамасыз етуге жұмсалады. Кәсіби спортты, атап айтқанда волейбол, футбол, хоккей, жеңіл атлетика, гандбол, үстел теннисі және күрес спорт түрлерін дамытуға 2,5 млрд теңге көлемінде қаржы бөлу көзделіп отыр, — деді басқарма басшысы.
Сонымен қатар келесі жылы 2,7 млрд теңгеге 4 спорт нысанын салу жоспарланған. Атап айтқанда:
- Өскемен қаласындағы ипподром құрылысы – 500 млн теңге;
- Өскемен қаласындағы волейбол орталығы – 1,0 млрд теңге;
- Риддер қаласындағы дене шынықтыру-сауықтыру кешені – 981,9 млн теңге;
- Зайсан ауданы Сарытерек ауылындағы спорт модулінің құрылысы – 200 млн теңге.
