Қазақстанда 2026 жылдың 1 қаңтарынан бастап жаңа Салық кодексі күшіне енеді. Соның аясында арнайы салық режимдерінің саны жетіден үшке дейін қысқарады. Бұл өзгерістер туралы ШҚО мемлекеттік кірістер департаменті өкілдері өңірлік коммуникациялар қызметінде өткен баспасөз мәслихатында түсіндірді, деп хабарлайды F16.kz.
Қандай салық режимдері қалады?
Жаңа кодекс бойынша төмендегі үш режим ғана сақталады:
- өзін-өзі жұмыспен қамтығандарға арналған режим;
- жеңілдетілген декларация;
- шаруа немесе фермерлік қожалықтарға арналған режим.
Ал бұрын қолданылған патент, тұрақты шегерім, ауылшаруашылық кооперативтеріне арналған режимдер жойылады.
Өзін-өзі жұмыспен қамтығандарға арналған
Бұл режим табысын заңдастырып, әлеуметтік кепілдіктер алуға мүмкіндік береді. ЖШС ретінде тіркелу міндетті емес, жеке табыс салығы мен ҚҚС төленбейді. Барлық төлем – табыстың 4%-ы ғана, ал кірістер мобильді қосымша арқылы есептеледі.
Жеңілдетілген декларация кімдерге арналған?
Жылдық табысы 2,5 млрд теңгеге дейінгі шағын бизнес осы режимде жұмыс істей алады. Салық мөлшерлемесі – 4%, декларация жылына екі рет тапсырылады.
Шаруа және фермер қожалықтары үшін
Бұл режим бұрынғы бірыңғай жер салығын алмастырады. Жеке табыс салығы – 0,5%. Есеп жылына бір рет тапсырылады, төлем аграрлық маусымға қарай жылына екі рет жүзеге асады.
Маңызды ескерту: 2026 жылдың 1 наурызына дейін өз режимін таңдап, хабарлама жібермеген жеке кәсіпкерлер автоматты түрде тіркеуден шығарылады немесе жалпы тәртіппен салық төлеуші болып саналады.
Жеке тұлғалардың банкроттығы: маңызды мәліметтер
2023 жылдың наурызынан бастап қолданыста келе жатқан «Азаматтардың төлем қабілеттілігін қалпына келтіру және банкроттық туралы» заңға сәйкес азаматтарға қаржылық жағдайын реттеудің үш жолы ұсынылады:
- Сотқа дейінгі банкрот – 1600 АЕК-ке дейінгі қарызы барларға.
- Сот арқылы банкрот – қарызы 1600 АЕК-тен жоғары азаматтарға.
- Төлем қабілеттігін қалпына келтіру – банкротсыз, қарызды 5 жылға дейін бөліп төлеу.
Банкрот болған азаматтарға қандай шектеулер бар?
- 5 жыл несие ала алмайды.
- Қайта банкрот болу үшін кемінде 7 жыл өтуге тиіс.
- Қаржылық жағдайы 3 жыл бақылауда болады.
- Алимент және денсаулыққа зиян келтірген шығындар есептен шығарылмайды.
Статистика
2025 жылдың басынан бері:
- сотқа дейінгі банкротқа 4 645 өтініш берілген (512-сі мақұлданды),
- сот арқылы банкротқа – 101 өтініш (23 қабылданды),
- төлем қабілетін қалпына келтіру – 78 өтініш (37 қабылданды).
