Шығыс Қазақстан облысында ерлі-зайыптылардың ажырасуы көбейді. Бұл туралы Шығыс Қазақстан облыстық Әйелдер ісі жөніндегі комиссияның отырысында айтылды, деп хабарлайды F16.kz.
Жиында өңірдегі демографиялық ахуал мен отбасылық құндылықтарды нығайту мәселелері талқыланды. Кейбір оң көрсеткіштерге қарамастан, қатысушылар ажырасу жағдайларының артып отырғанын, неке қиған жастардың отбасылық өмірге дайындық деңгейі төмен екенін атап өтті. Осыған байланысты қоғамда дәстүрлі отбасылық құндылықтарды кеңінен насихаттау қажет. Әкелер және ата-аналар кеңестерімен қатар жастар санасатын блогерлер мен қоғам белсенділерін де отбасы институтын дәріптеуге тарту ұсынылды.
Отырыс барысында демографиялық жағдайға қатысты талдау ұсынылды. Негізгі үрдістерге тоқталсақ:
- халықтың қартаюы байқалады;
- әлеуметтік салаға түсетін жүктеме артқан;
- кейінгіжылдары туу көрсеткіші төмендеген, әсіресе 25 жасқа дейінгі жас отбасылар арасында.
- Жасанды түсік жасатужағдайлары әлі де анықталып, халықтың табиғи өсімі қысқарған.
Ресми деректерге сүйенсек, өңірде адам өлімі, оның ішінде сәбилердің шетінеуі азайған. Сыртқы көші-қон бойынша теріс сальдоның төмендегіні байқалады.
Отырыс қорытындысы бойынша облыс әкімі Нұрымбет Сақтағанов бірқатар тапсырма берді:
- аудандардың ұсыныстарын ескере отырып, 2026 жылға арналған кешенді іс-шаралар жоспарын әзірлеу;
- жұмысты орталықтандырылған форматта ұйымдастырып, комиссия құрамын қайта қарау;
- дағдарыс жағдайындағы отбасыларды қолдау шараларын күшейту;
комиссияның аудандарға шығуын ұйымдастырып, қаңтар айының ортасына дейін кездесулер кестесін бекіту.
Айта кетейік, отбасы институтын қолдауға бағытталған жұмыс алдағы уақытта да жүйелі түрде жалғасын табады.
