Елімізде медицина қызметкерлері мен жедел жәрдем көлігі жүргізушілеріне қатысты зорлық-зомбылық көрсеткендерге жаза күшейтіледі, деп хабарлайды F16.kz.
Сенат депутаттары тиісті кодекстерге енгізілетін өзгерістерді қолдады. Заңнамалық түзетулер аясында Қылмыстық кодекс жаңа 380-3-баппен толықтырылмақ. Онда медицина қызметкеріне немесе жедел жәрдем жүргізушісіне қызметтік міндетін орындау кезінде күш қолдану немесе күш қолданамын деп қорқыту үшін жеке жауапкершілік қарастырылған.
Қорқыту үшін қандай жаза бар?
Күш қолданамын деп қорқытқан азаматтарға:
- 200-ден 500 айлық есептік көрсеткішке (АЕК) дейін айыппұл;
- түзету жұмыстары;
- 300 сағатқа дейін қоғамдық жұмыс;
- 2 жылға дейін бас бостандығын шектеу немесе айыру жазасы тағайындалуы мүмкін.
Егер әрекет ауырлататын мән-жайлармен жасалса, 3 жылға дейін бас бостандығын шектеу немесе айыруды жазасы беріледі.
Күш қолданса
Медицина қызметкерінің өмірі мен денсаулығына қауіп төндірмейтін күш қолдану үшін:
- 500-ден 1000 АЕК-ке дейін айыппұл;
- немесе 2 жылдан 3 жылға дейін бас бостандығынан айыру көзделген.
Ауырлататын жағдайлар болған жағдайда жаза 3 жылдан 7 жылға дейін көбейеді.
Ауыр зардап келтірсе жазалау уақыты ұзарады.
Егер күш қолдану медицина қызметкерінің өмірі мен денсаулығына нақты қауіп төндірсе, кінәлі тұлға:
- 5 жылдан 10 жылға дейін бас бостандығынан айырылады.
Ал ауырлататын мән-жайлар анықталған жағдайда жаза мерзімі 7 жылдан 12 жылға дейін ұлғаяды.
Заңға енгізіліп отырған бұл өзгерістер медицина саласы қызметкерлерінің қауіпсіздігін арттыруға және оларға қарсы жасалатын заңсыз әрекеттердің алдын алуға бағытталған.
