Бүгін, 25 желтоқсанда Шығыс Қазақстан облысының Асубұлақ кентінде күрделі жөндеуден кейін дәрігерлік амбулатория ашылды. Аталған денсаулық сақтау нысанының әлеуметтік маңызы жоғары және ол ауыл тұрғындарының сапалы медициналық көмекті еш кедергісіз алуына мүмкіндік туғызады, деп хабарлайды F16.kz.
Медицина мекемесінің іргетасы 1970 жылы қаланған. Содан бері бұл нысан кент тұрғындарына қалтқысыз қызмет көрсетіп келеді. Кейінгі жылдары ескіріп, тоза бастаған еді. Биыл ғимарат толық жаңғыртудан өтті. Күрделі жөндеу жүргізіліп, материалдық-техникалық база жаңартылды, емделушілер мен медицина қызметкерлері үшін қазіргі заманғы денсаулық сақтау стандарттарына сай қолайлы жағдайлар жасалды.
Қазір амбулаторияда 11 медицина қызметкері еңбек етеді. Оның ішінде екі дәрігер, алты орта буын медицина қызметкері және үш кіші медицина қызметкері бар. Медициналық көмек 1700-ден астам тұрғынға көрсетіледі.
Мекеме жұмысының тиімділігін айқындайтын маңызды көрсеткіштердің бірі – ана мен бала өлімінің болмауы. Бұл медицина қызметкерлерінің жоғары кәсібилігі мен жауапкершілігін айқын көрсетеді.
Амбулаторияда жалпы тәжірибе дәрігері мен акушер-гинеколог кабинеті, емшара және егу кабинеттері, сондай-ақ үш төсек-орынға арналған күндізгі стационар бар. Қолайсыз эпидемиологиялық жағдай кезінде науқастарды дер кезінде қарайтын тексеру-кабинет жұмыс істейді.
Сонымен қатар ғимаратта жедел медициналық жәрдем қосалқы станциясы бар, бұл тұрғындарға шұғыл медициналық көмек көрсетуге мүмкіндік береді.
Әсіресе ауылдық жерде денсаулық сақтау жүйесін дамыту – мемлекеттік саясаттың басым бағыттарының бірі. Медициналық инфрақұрылымды жаңғырту және қызмет сапасын арттыру бойынша жұмыстар алдағы уақытта да жалғасын табады.
