Елімізде «крутой» автокөлік нөмірлер 10%-ға қымбаттады. Бұл айлық есептік көрсеткіштің (АЕК) өсуімен байланысты, деп хабарлайды F16.kz.
Жоғары сұранысқа ие мемлекеттік тіркеу нөмірлері белгілерінің (МТНБ) бағасы әртүрлі болып келеді.
Көпшілік қолданатын VIP нөмірлер: әріптері бірдей немесе мына сандық комбинациялар — 010, 020, 030, 040, 050, 060, 070, 077, 080, 090 және 707. Бұл нөмірлер қазір 246 525 теңге тұрады.
Дәл осындай комбинациялар, бірақ әріптік белгілері де бірдей нөмірлердің бағасы – 493 050 теңге.
Сандары 100, 111, 200, 222, 300, 333, 400, 444, 500, 555, 600, 666, 700, 800, 888, 900 және 999 болып келетін нөмірлер 592 525 теңгеге бағаланған. Осы сандық комбинациялар және әріптері де бірдей болса 839 050 теңге деп көрсетілген.
001-009 және 777 түріндегі сандық белгілер тіпті қымбат: 986 100 теңге.
Автокөлік нөмірлердің ішінде ең қымбаты — бірдей әріптік белгілері бар 001-009 және 777 нөмірлері. Биыл бұлардың бағасы – 1 232 625 теңге.
Естеріңізге сала кетсек, 2026 жылғы 1 қаңтардан бастап 1 айлық есептік көрсеткіш (АЕК) 4 325 теңге (былтыр – 3 932 теңге) болды. Өсім — шамамен 10%.
Сонымен қатар Қазақстанда биылдан бастап автокөлік иелері қалаған кез келген әріп пен сан комбинациясын таңдап, мемлекеттік нөмірге жаздыра алады. Бұл норма жаңа Салық кодексінде жазылған. Жаңа опция «крутой» серияларды қоспағанда, қолжетімді болады. Олардың қатарына 001–009, 777, сондай-ақ 010, 020, 030 және өзге де ерекше комбинациялар жатады.
Таңдалған нөмірдің бағасы 10 айлық есептік көрсеткішке (АЕК) тең.
